又到中秋節，人圓兩團圓。
冇記錯的話，已是第三個年頭冇喺香港同屋企人過中秋了。
前兩年喺非洲，今年喺南美洲，不過就算喺乜洲，都無阻收到喺老遠嘅家姐一幅月餅禮盒嘅相，上面寫住：「The same moon share at the same time, wherever we are.」
雖然唔知盒月餅咩味道，或者好難食，不過乜味都好啦，最緊要係人情味。
細個一齊喺屋企慶祝中秋，由玩紙燈籠，喺花園點吓爉燭，到大個咗到冇嘢好玩走去煲爉（其實真係好危險！）不過無論幾姊弟玩乜做乜都好，都要爭餐飽。難得媽子帶我哋去麥記，幾條友仔要爭或要猜包剪揼決定邊個食長薯條邊個食短嗰條。明明一盒廿支裝平平無其嘅爉燭，都可以爭邊個點新爉燭，熔到一pat嗰啲就隊俾隔離嗰個，爭邊個用靚啲大啲嘅月餅盒裝爉。後來大大吓，細佬追唔上我哋兩姊妹要爭嘅嘢，退出爭霸雷台，因為爭嘅係邊個可以睇本Yes!先。
何曾有個願望，望阿媽塞返家姐同細佬入肚皮，從此我就可以過住優哉悠哉嘅生活，唔洗陰公到食薯條都要度住你食一條長，咁我要食返兩條短，但長薯條又腍過短薯條脆卜卜喎，咁點計先？
當大家活在同一屋簷下，連去個廁所都要爭，就將無關痛癢的瑣事放到無限大，覺得呢個世界咁大，點解偏偏上天派著佢同佢同我一齊住？當踏出呢個瓦遮頭後，月亮高高掛在天空上，照亮著曾經棟高隻腳一齊爬飯嘅飯腳，夏天一齊幫老豆抹車然後烈日當空幾隻嘢喺車廂裡面熱到發豬瘟嘅伙伴，夾手夾腳鉗住汪汪狗沖涼結果我哋仲濕過隻汪狗......
You don’t choose your family, they’re a gift to you, as you are to them.
雖然仍未能喺同一片土地，但能分享同一個月光，令我諗起一句老人家嘅口頭禪「上天自有安排」。俾著上天若安排另外兩個人類俾我做兄弟姊妹，或安排我成為獨女，我今日亦未必會有咁多諗起都爆笑嘅開心回憶。
The same moon share at the same time, wherever we are.
The same shelter share the happiness,
whoever we are.
祝大家中秋節快樂！大家都要開開心心，沖返壺茶棟高隻腳，同身邊親人至愛一邊賞月一邊食月餅喔！
Search